Katatayuan ng mga Salitang Tayabasin at mga Salik Na Nakakaapekto sa Grado 7 sa Kanilang Paggamit: Batayan sa Pagbuo ng Diksyunaryo

Ang pananaliksik na ito ay tungkol sa Katatayuan ng mga Salitang Tayabasin at mga Salik na Nakakaapekto sa mga Mag-aaral sa Grado 7 sa Kanilang Paggamit Bilang Gabay sa Pagbuo ng Diksyunaryo. Ang pangunahing layunin ng pananaliksik na ito ay makalap ang demograpikong profayl ng mga tagasagot batay sa kanilang edad; kasarian; at libangan o interes. Nais din malaman ng mananaliksik ang mga salitang Tayabasin na gamitin pa rin ng mga kabataan sa kanilang pakikipagkomunikasyon. Layunin din ng pananaliksik na ito na matukoy ang mga salik na nakakaapekto sa mga mag-aaral sa Grado 7 sa kanilang paggamit ng mga salitang Tayabasin batay sa social media; mass media/ broadcast media; kapamilya; at kaibigan/kamag-aaral. Inalam din ng mananaliksik ang lebel ng pagtanggap ng mga guro sa diksyunaryong kinapapalooban ng mga salitang Tayabasin sa bayan ng Tayabas batay sa pagkakabuo; nilalaman; impak sa guro; at orihinalidad. Nilayon din ng pananaliksik na ito na makabuo ng isang diksyunaryo ng mga salitang Tayabasin bilang maging sanggunian ng mga guro, mag-aaral, taal na Tayabasin at mga hindi Tayabasin na magagamit nila sa kanilang pakikipagtalastasan at pag-aaral. Ang pananaliksik na ito ay gumamit ng deskriptibong talatanungan na binuo upang mailahad ang mga makukuhang impormasyon at maisagawa ang pananaliksik. Nagkaroon ng pagtatanong at pakikipanayam ang mananaliksik sa mga matatandang Tayabasin na matagal nang naninirahan sa bayang ito upang makalap at malikom ang mga salitang Tayabasin. Pagkatapos ang pangangalap ng mga salitang Tayabasin, nagpasagot ang mananaliksik sa mga mag-aaral na mula sa grado 7 na may kabuuang bilang na isandaan pitumpu’t pitong (177) mag-aaral na tagasagot na pinili sa pamamagitan ng cluster sampling na siyang sumagot sa sarbey tseklist. Batay sa naging resulta,ang mga naging konklusyon ng pag-aaral ay una, halos lahat ng mga tagasagot ay nasa edad 12-13 taong gulang na mahigit kalahati ay mga babae na ang pangunahing interes o kinahihiligan ay ang pakikipagchat o paggamit ng anumang social media na may 77 bahagdan kaysa paglalaro ng basketbol o anumang larong pampisikal. Ikalawa, mayroon pa ring mga ilang salita na alam at ginagamit ng mga kabataan sa kanilang pakikipagkomunikasyon gaya ng bistida, apuyan, bisiro, guyam, kulig, linang, bangbang, budin, balinghoy, maluto, gayat, baak, masirino at turnuhan. Ikatlo, ang mga salik na nakakaapekto sa paggamit ng mga mag-aaral sa mga salitang Tayabasin ay ang social media gaya ng messenger, facebook, youtube. Twitter, Gmail, Yahoo Mail, at Instagram; iminungkahi ng manansa mass media/ broadcast media naman ay variety shows, teleserye/ telenobela, musika, sine at mga cartoon; kasama rin ang lahat ng kabilang sa kapamilya at kaibigan/kamag-aaral. Ikaapat, ang diksyunaryong binuo ay maaaring makatulong sa mga guro at mag-aaral sa pagtalakay at pag-aaral na may kinalaman sa lokalisasyon sa mga salitang Tayabasin. Batay naman sa naging resulta at konlusyon,nabuo ang mga rekomendasyon na una, upang lubos na mapanatili ang salitang Tayabasin, maaaring gamitin ng guro ang mga salitang Tayabasin sa kanilang pagtuturo, pakikipag-uganayan sa mga mag-aaral para kahit nasa loob man sila ng paaralan ay nagagamit pa rin nila ang salitang kinagisnan. Ikalawa, maaari ring magsagawa o bumuo ng mga gawain sa mga mag-aaral na kaaangkupan ng social media na magagamit nila ang mga salitang Tayabasin upang lubos nila itong magamit. Ikatlo, sa mga mamamayan ng Tayabas, nararapat nilang gamitin ang wikang Tayabasin kahit nasa bahay man sila, trabaho, o kahit saan man sapagkat ito ay pagkakakilanlan ng kultura ng bayan. Ikaapat, sa mga susunod na mananaliksik, maaaring hindi taal na Tayabasin na naninirahan na sa baying ito ang gamitin na tagasagot o mismong mamamayan ng Tayabas ang gamitin bilang tagasagot. Ikalima, maaaring dagdagan at lagyan ng etimilohiya ang mga salitang Tayabasin na nakalap at makakalap.