ISTRATEHIYANG PAGTUTURO NG NOBELANG NOLI ME TANGERE; BATAYAN SA PAGBUO, PAGTANGGAP AT BALIDITI NG WORKTEXT

Ang pag-aaral na ito ay tungkol sa Istratehiyang Pagtuturo ng Noli Me Tangere; Batayan sa Pagbuo, Pagtanggap at Baliditi ng Worktext. Naglayong malaman ang iba’t ibang mabisang istratehiya sa pagtuturo sa isa sa mga akdang nobela ng pambasang bayani na si Dr. Jose Rizal, ang kanyang nobelang Noli Me Tangere gamit ang worktext. Ang iba’t ibang istratehiya sa pagtuturo ay makatutulong sa mas malalim na pang-unawa at pagkakaroon ng mataas na kalidad ng edukasyon at maging handa sa iba’t ibang hamon ng buhay. Ito rin ay isang paraan para sa pagtamo ng kaalaman ng mga mag-aaral at maging kapaki-pakinabang para sa hinaharap na mas magkaroon ng mataas na kalidad ang edukasyon. Ang mga istratehiya sa pagtuturo ang naging batayan sa pagbuo, pagtanggap at baliditi ng worktext sa pag-aaral ng nobelang Noli Me Tangere. Ang deskriptibong pamamaraan o palarawang pagsisiyasat ay isinagawa sa pamamagitan ng mga guro na nagtuturo ng asignaturang Filipino sa mataas na paaralan sa lungsod ng Tayabas at mga mag-aaral sa ikasiyam na taon sa nasabing paaralan. Ginamit ang weighted mean, frequency at pormulang t-test bilang pamamaraang estadistika upang maanalisa ang mga datos na nakalap. Gumamit ang mananaliksik ng talatanungang nasa anyong tseklist na nagsilbing instrumento upang malaman ang baliditi at pagtanggap ng mga guro sa ginawang worktext. Ang mga mag-aaral sa ikasiyam na taon na may kabuuang dalawang daan at apat na pu’t dalawang (242) mag-aaral sa mataas na paaralan sa lungsod ng Tayabas ang naging tagasagot at dalawampu’t dalawang (22) guro na nagtuturo ng asignaturang Filipino sa nasabing paaralan. Batay sa mga naging resulta ng pag – aaral sa demograpikong profayl ng mga taga-sagot na guro, ipinakikita na halos ang mga gurong tagasagot ay bago pa lamang sa larangan ng pagtuturo na may edad na 21 hanggang 30 taong gulang at 50% sa kanila ay nagtuturo sa asignaturang Filipino mula 1 taong hanggang 5 taon. Ang istratehiyang pagtuturo na pakikinig sa awiting may kaugnayan sa akda sa pamamagitan ng CD, DVD player o anumang kagamitang napapakinggan ang may pinakamataas na bahagdan. Nangangahulugan lamang na ito ang madalas na ginagamit ng mga guro sa pagtuturo upang mapukaw ang kawilihan at interes ng mga mag-aaral sa kanilang aralin sa pagtalakay sa nobelang Noli Me Tangere. Sa lebel ng pagtanggap sa worktext ng mga guro sa nobelang Noli Me Tangere nagpakita na lubos na tinatanggap ang ginawang worktext. Para naman sa mga salik na pangguro na nagbibigay kawilihan sa mga mag-aaral sa pagtuturo ng Noli Me Tangere nagpakita ito na lubos na sumasang-ayon ang mga taga-sagot. Makikita na higit na natututo ang mga mag-aaral kung gagamit ang guro ng iba’t ibang istratehiya sa pagtuturo upang hindi maging kabagut-bagot para sa mag-aaral ang pagtalakay ng nobelang Noli Me Tangere. Sa pag-aaral na ito, sa isinagawang pre-test makikitang mas mababa ang nakuhang mean ng mga mag-aaral kumpara sa mean na isinagawa matapos gamitin ang worktext sa pamamagitan ng isinagawang posttest. Sa resulta ng posttest, makikitang tumaas ang iskor ng mga mag – aaral na may batayan na average mastery. Nanganghulugan lamang na may mahalagang pagkakaiba sa pagitan ng performans ng mga mag-aaral sa baitang 9 sa pretest at posttest. Sa pamamagitan ng worktext, naunawaan ng mga mag – aaral ang kanilang aralin na naging resulta sa pagtaas ng kanilang mga iskor sa isinagawang posttest. Sa naging resulta, konklusyon ng pag-aaral, iminumungkahi ng mananaliksik na maaaring gamitin ng guro at mag-aaral ang ginawang worktext upang mapadali ang pagtalakay at magkaroon ng kawilihan ang mga mag-aaral sa nobelang Noli Me Tangere.